Waaraan glo ons?

Ons glo in God die Vader, vol liefde en genade. Hy is die bron van lewe en verlossing, en roep elke mens tot ’n persoonlike verhouding met Hom.

Ons glo in Jesus Christus, die eniggebore Seun van God, waarlik God en waarlik mens.
Hy is deur die Heilige Gees verwek en uit die maagd Maria gebore. Hy het vir ons sonde gely, aan die kruis gesterf, begrawe en op die derde dag opgestaan. Hy het opgevaar na die hemel en sit aan die regterhand van die Vader as ons Heer en Verlosser.

Ons glo in die Heilige Gees, wat mense van sonde oortuig, geloof wek en gelowiges toerus om volgens God se wil te leef. Hy deel geestelike gawes uit en lei ons in waarheid en heiligheid.

Ons glo dat die Bybel die Woord van God is – geïnspireer deur die Heilige Gees en gesaghebbend vir leer en lewe. Dit is ons gids vir geloof, verlossing en die praktyk van die Christelike lewe.

Ons glo dat God die mens na Sy beeld geskape het, maar dat die sondeval die verhouding tussen God en mens verbreek het. Alle mense het verlossing nodig, en dit word net deur Jesus Christus moontlik gemaak.

Ons glo dat verlossing ’n gawe uit genade is wat deur geloof in Jesus Christus ontvang word. Deur sy bloed het ons vergifnis, versoening met God en die hoop op die ewige lewe.

Ons glo dat die kerk die liggaam van Christus is, waar gelowiges saam aanbid, mekaar dien en die evangelie aan die wêreld uitdra.

Ons glo in die waterdoop van gelowiges as ’n teken van nuwe lewe in Christus, en in die Nagmaal as ’n gedenkmaaltyd van sy dood en opstanding.

Ons glo dat Jesus Christus weer sal kom, die dooies sal opwek, en ’n nuwe hemel en ’n nuwe aarde tot stand sal bring waar God se kinders vir ewig by Hom sal wees.